مجلة قعدة مُبدعين
" كنت قاعده في البلكونه بغني "
_يا ورده المعي خلي الدنيا تبان
يرجع الا كان.. يرجع الا ضاع
ضاع من زمان
*ليه يا ريناد بتغني الاغنيه دي؟!
_زعلانه
*ليه يا حبيبتي انا زعلتك في حاجة؟
_ريناد مش بتزعل من حاتم بس هو في سوال.
*اسالي يا روحي
_هو انا ليه مختلفه، يعني مش شبه صحابي، صحابي حلوين اوي انا مش شبهم ولا حتي تفكيرهم، مختلفه، في ناس بتقرف مني بسبب البهاق بس ده طبيعتي دي حاجة مش بيدي يا حاتم
* انا عارف انه مش بيدك ياروحي بس ليه منفكرش ان الاختلاف ده حاجة مميزه يعني نفكر بطريقه حلوه
قولت بزعل
_بس مش كل الناس بتقدر تفكر بطريقه حلو، كلهم شايفني اني وحشه
وكملت بس بقهر
_انت متخيل انهم مفكريني ان ممكن اعديهم محدش بيسلم عليا
اتنهد حاتم و رد
*انا عارف يا حبيبتي بس انتي مميزه بنوته صغيره و جميله شعرها عامل زي ريبونزل عيونها زرقا، انتي كده مختلفه اوي عنهم
_اعمل ايه با اختلافي وان مميزه لو محدش بيحبني
رد. حاتم بسرعه
* حبي نفسك، ايوا حبي نفسك مش انتي بنوته تتحب
_ايوا
*وكمان طيبه
_بس اوقات الطيبه دي بتكون حاجة وحشة صحابي بيستغلو ده و بياخدو مني سندوتشات بتاعتي او المقلمه او الكتاب عشان عارفين ان مش هزعل و ان كمان زي ما انت قولتلي اساعد الناس لو محتاجه حاجه بس تفتكر ليه بيعملو ده ليه الاستغلال
بص ليا حاتم و اتنهد و قال بحزن
*هو انتي كبرتي امتا كده وعرفتي الاستغلال
_عشان يا بابا هما بيعملو كده بيتريقو علي شكلي و بيستغلو ان مش بقول لا
*يبقا نتعلم نقول لا و نتعلم ان احنا حلوين و نتحب و يبقا عندنا ثقه في نفسنا
_و ده ازاي؟
شاور علي قلبي و قال
* بيبدا من هنا من قلبك، ان مفيش بنوته زيك و اصلا هيكون في بنوته زيك و كمان ذكيه و عسوله
_تفتكر ان في حد ممكن يتقبل ده غيرك انت و ماما و ميقرفش مني؟
* اللي يحبك بجد، هيشوف قلبك قبل أي حاجة تانية… والناس اللي شايفة البهاق بس، عمرها ما كانت تستاهل قلبك أصلًا
بصيتله وانا ساكته، و رديت
_بس انا تعبت يا بابا… تعبت اوي من نظرات الناس
قرب مني حاتم وربت علي شعري بحنيه
*عارف يا حبيبتي وعارف ان الكلام ساعات مبيخففش، بس اوعديني متكرهيش نفسك عشان ناس مبتفهمش
_بس هما كتير… كلهم بيبصو ليا كأني غريبه
ابتسم حاتم بحزنو قال
*ويمكن عشان انتي مختلفه فعلًا، بس مش الاختلاف الوحش الاختلاف الحلو الا نادر يتكرر
نزلت عيني للأرض و قولت بصوت مكسور
_نفسي يبقا عندي صاحبه واحده بس واحده متخفش تمسك ايدي
سكت حاتم ثواني وبعدها مد ايده ليا
*طب وانا؟
بصيت لإيده و ابتسمت غصب عني
_انت بابا
ضحك بخفه
*و قبل ما اكون بابا، انا صاحبك الأول
ڪ/ولاء البدري
