مجلة قعدة مُبدعين
" حبيب عيوني "
كنت قعده في البلكونه انا و يوسف وانا بغني
_حبيب عيوني، حبيب احلامي
حبيب دموعي و هنا ايامي
اهون عليك اسهر بالامي
رد عليا بضحك
_اه تهوني عادي عليا
بصتله ببرائه
_يعني اهون عادي
_عشان عيونك الحلوين دول عمرك ما تهوني عليا او علي قلبي
_ ابتسمتُ رغمًا عني، وضربتُه بخفة على كتفه.
رخم... افتكرتك بتتكلم بجد.
ضحك وهو بيبصلي:
_أنا أزعل القمر ده؟ ده أنا لو زعلت منك، هروح أصالح نفسي الأول.
رفعت حاجبي وأنا بمثل الزعل:
_آه... بقى كده؟
قرب شوية وقال وهو مبتسم:
_هو أنا عندي كام حبيبه في الدنيا عشان أزعلها؟
ضحكت وأنا هزيت راسي:
_بتعرف تقول كلام حلو من إمتى؟
رد بسرعة:
_لما ألاقي اللي يستاهل يسمعه.
سكتُّ لحظة وأنا بحاول أخبي ابتسامتي.
بصلي بطرف عينه وقال:
_خلاص، كملي الأغنية... بس المرة دي من غير "أهون عليك"، عشان الكلمة دي مش لايقة عليكي أصلًا.
ابتسمت بمكر وقلت:
_قولي يا جو... أنا حلوة؟
بصلي كام ثانية، وبعدين قال بكل برود:
_مين الكداب اللي قال إنك حلوة؟
بصيتله بذهول وقلت:
_نعم؟!
انفجر في الضحك وقال:
_حلوة؟ دي كلمة قليلة عليكي... ده إنتِ معادلة صعبة محدش عرف يحلها. بس قوليلي، عاملالنا إيه أكل يا ست الحلويات؟
ابتسمت بفخر:
_عاملة مكرونة بشاميل... وفراخ محمرة.
ابتسم وهو بيفرك إيده:
_تسلم إيدك يا ست الحلويات.
بصيتله بتردد شوية:
_ينفع أطلب طلب؟
رد بسرعة:
_لا.
_بليز.
هز راسه وقال:
_No.
مطيت شفايفي وقلت:
_بلييييز.
ضحك وقال:
_طيب... إيه الطلب؟
ابتسمت:
_ينفع بعد الأكل نخرج شوية أنا وإنت؟ بقالنا فترة حلوين مخرجناش.
ابتسم وهو بيبصلي:
_بس كده؟ عيوني يا حلاوة الملامح... الطلب يتنفذ، وصاحبة الطلب تحت أمرها.
ابتسمت تلقائيًا:
_حبيب عيوني.
ابتسم و رد عليا بحب
_بحب اسمع منك كلمه حبيب عيوني بحس ان الدنيا كلها بقت عندي.
رديت عليه با ابتسامه
_عيوني بتحب تشوفك
ابتسم وقال:
وانتي عمري كله يلا، سمعيني بقى باقي الأغنية، بحبها منك
ابتسمت وكمّلت الغُنا بصوت أهدى، وهو قاعد يسمعني، وكل شوية يبصلي ويبتسم... كأنه حافظ الأغنية، لكنه كان مركز فيا أكتر من أي كلمة فيها.
بقلم: الكاتبة ولاء البدري ✍️
كاتبه_ليلو
