الدقهلية تثبت أقدامها في جائزة الدولة للمبدع الصغير عن طريق بسنت محمد ...حوار خاص لقعدة مبدعين
استطاعت أن تفوز بالمركز الأول للفئة العمرية الثانية
بكلماتها وأسلوبها الفريد
1-بسنت محمد اهلا بكِ في قعدة مبدعين عرفينا بنفسك اكتر ؟
اهلا بيكم ، بسنت محمد بنوته مصريه من ارياف المنصورة مُحمله بالشغف والطموح وعندى حجات كتير احب اعملها اتمنى الدنيا تساعنى وتساع افكارى .
2- كيف تلقيتي خبر فوزك بالجائزة ؟
قولت الحمد لله طبعا وفرحت جدا ان موهبتى بتقدر بشكل ما او بتتشاف، الإستمرارية بتحتاج دعم وخبر الفوز فرحنى وادانى دافع لقدام .
3-ماهي اهم الاشياء التي تطمحي إليها في المستقبل ؟
والله طموحى ف المستقبل بنسبة للشِعر هو أن اكتب النص اللي يتقال عليه شِعر، كل الى بطمح فيه اوصل لمستوى يرضينى من الكتابه ،ويعنى اتمنى احاول اطور من الحركه الثقافيه فى الدقهلية وعلى قد ما اقدر ف كل مكان ابقى فيه بطرق مختلفة ،تتماشى مع جيلى بحيث يفضل عنده شغف وميزهقش .
4-من هو ملهم بسنت محمد؟
والله انا كل حد عملى موقف حلو او علمنى شيئ او حتى عمل قصادى موقف هو مُلهم بنسبالى، لكن الملهم الاكبر هى نشأتى بلدى " مصر"
5-شغفك بالغناء من اين جاء وكيف كان له دور في كتاباتك ؟
والله انا كنت احب اسمع اوى وبصراحة ف الاول مكنتش اهتم بالصوت اوى لكن كنت اهتم بمعانى الكلام واى الى الكاتب عاوز يوصله واروح ابحث بعد م اسمع الاغنيه مين كتبها ومين لحنها ف بدأت اهتم من هنا .
6- لو هناك شخص واحد صاحب فضل في نشأتك فمن يكون ؟
هو مش شخص واحد بس الحقيقة لكن لو هقولهم بترتيبهم
ف "حنين" اختى الكبيرة اول من اكتشف موهبة الكتابه شافت انى بقول كلام له معنى فعلا واول نص كتبته كان عن فلسطين اختى كتبته بخط أيدها ولسا محتفظة بيه لحد دلوقتي عندها، حنين اكتشفتنى لكن الاستمراراية جات من عند والدى كان بيروح معايا كل قصور الثقافه وكل الاماكن وبيسمعنى ومامتى واخواتى كلهم بصراحه انا محظوظة لأنى متحاوطة بناس ليهم دور ف نجاحى .
7-هل لكي مؤلفات، وماهي مشاريعك القادمة ؟
ليا نصوص نُشرت في بعض الجرائد والمجلات لكن مفيش ديوان حتى الآن، اما بالنسبة لمشاريعى القادمة نفسي اطور من كتابتى وبجرب ف فن كتابه الاغنيه وبتعلم فيه وبدرسه من باب المعرفة .
8-ماهي القصيدة التي تحبي أن تهديها لمجلة قعدة مبدعين؟
اشكر مجلة قعدة مبدعين على هذا اللقاء واشكركِ أيضا، وأهديكم نَص التَجربة :
الدنيا اسهل من كده بكتير
قالها ودخان السجاير عبى
رئتين الهوا
الدنيا اصعب للى عنده ضمير
خُد م الحجات نصها الكامل
سيب المسافة للى يقدرلها
اسلك طريقك في البسيط منه
سيب المجازفة للى يتمنوا
قال الكلام والتجربه جنبه
والرحله راسمه خطوطها جنب عنيه
اكبر دليل للصدق كان هو
قالى السنين الجايه تثبتلك
قال الطريق والرحلة والايام
تبت ف ايد التجربه وامشى
الدنيا سهله للى عنده كلام
اما الى عاشها بجد ميقولشى
انا وانت مش اعداء
ومكانا مش باقى
هنقوم وغيرنا كتير
مستنى لسا الدور
انا قولتلك
قول للى جاى بعدك
عَرض الامانه عليك
فشيلتها لوحدك
من يومها واحنا نشيل
ونكمل الدايره
متسبش تحتك اثر
خلى الى جى يعيش
الكرسى ده مش ليك
ولا ليا ولا ليهم
كل الى جاى عابر
الدنيا تغريهم
وان حتى قولنا كلام
يحذر الجايين
دى التجربه فِطرة على شكل بنى ادمين
وفي النهاية نشكر جهود الدولة نحو دعم الشباب والأطفال واصحاب المواهب على الدعم الحقيقي للمبدعين ونموذج بسنت محمد نموذج مشرف لبلدها ومحافظاتها وقريتها بلغتها البسيطة ومن مجلة قعدة مبدعين نتمنى لها كل التوفيق والنجاح .
