مجلة قعدة مُبدعين
حوار مع الكاتبة مني حمودة
1. في البداية ، ما سر شغفك بالكتابة؟
سر شغفي هو إني بشوف العالم بعين تانية ، الشعر بيخليني أقدر أحول المواقف العادية لصور وقصص، ويخليني ألاقي الجمال حتى في أبسط التفاصيل اللي ممكن تعدي على أي حد.
2.مَن أول داعم لكِ ؟ وهل لهذا الدعم تأثير فعال على نفسك ؟
أمي أول داعم ليا في كل حاجة عموماً وفي الشعر بالأخص ولولا أنها شجعتني وأحياناً كانت في البداية تسافر معايا من مكان لمكان لمجرد أنها تشوفني بعمل الحاجة اللي بحبها فمن غيرها كنت مش هقدر أحقق حاجة وممتنة ليها جداً على دا
3.لم اتَّجهت لكتابة الشعر وهل بدأتِ بالإلقاء أم لم تحاولي القيام ذلك ؟
اتجهت للكتابة لأنها بتعبر عني وعن مشاعري في كل الأحوال وعن رؤيتي للآخرين وإحساسهم أحياناً ..لا بدأت بالشعر مع العلم عندي مَلكة الإلقاء كويسة جداً الحمد لله.
4.ما الرسالة التي تودِّين إيصالها من خلال كلماتكِ؟ وهل للشعر نفس تأثير النثر؟
رسالتي هي الصدق إني أقدِّم تجربة إنسانية حقيقية بدون تجميل، وأبين إنْ الضعف والقوة والمشاعر بكل تناقضاتها هي اللي بتشكِّل هُويتنا وبتخلينا بشر، أما بالنسبة للمقارنة في مين أكتر في التأثير النثر أو الشعر ،
فمفيش حاجة اسمها كدا كل كاتب قدر يقدِّم حاجة كويسة تحت أي بند من فروع الأدب ووصلت لو لشخص واحد وأثَّرت فيه هو أدَّى مهمته مش مهم هو كان شعر أو نثر أو قصة أو رواية المهم أنها لمست حاجة جواه .
5.أي الكتب تفضِّلين المنفردة أم المجمعة ؟
بما إني شاركت في كتب مجمَّعة وكمان عملت ديوان خاص فكل منهم له مذاق في فرحته يعني المجمَّع بيعرفك على خبرات مختلفة ونجاح مجموعة ومشاركتهم نفس النجاح إحساس حلو وكمان إنك تكون انت صاحب التجربة وتكون خاصة بيك ومتحمِّل مسؤوليتها الكاملة كمان إحساس حلو بالنسبة ليا الاتنين نفس الحب .
6.ما سبب اتجاهك للكتابة؟ أهي أمر أساسي بالنسبة إليكِ أم مجرد هواية ؟
اتَّجهت ليها في وقت كنت مش قادرة أتكلم فيه عن مشاعري حاولت أترجمها على ورق ، ولا هي مجرد هواية.
7.ما مفهوم النجاح بالنسبة إليكِ؟ وهل حقَّق ديوانك النجاح المنشود ؟
زي ما قلت لو قدرت تلمس لو شخص واحد بكلامك فأنت نجحت وأنا أعتقد ولله الحمد إني قدرت أعمل دا وأكتر .
8.أي الكتَّاب تفضِّلين ( القُدامَى أم المعاصرين ) ؟
بفضل الكلمة الصادقة أياً كان زمنها ، القدامى فيهم فخامة وعمق، والمعاصرين فيهم قُرب وبساطة ، فبقرأ للقدامى عشان أتعلم، وللمعاصرين عشان أستمتع.
9.ما ذائقتكِ الأدبية؟ وهل تفضِّلين الكتابات الخيالية أم الواقعية ؟
ذائقتي الأدبية بتميل نحو الأدب الإنساني والنفسي بدور دائماً عن النصوص اللي تلمس جوهر النفس البشرية. لذا أجد نفسي بين ضفتي الشعر سواء فصاحة القصيدة أو صِدق العامية، وبين كُتب علم النفس التي تُكتب بلغة أدبية قريبة من الناس، زي كتابات الدكتور محمد طه في 'الخروج عن النص' و'علاقات خطرة'. تستهويني القدرة على تحليل المشاعر الإنسانية وصياغتها في قالب إبداعي يجعلني أفهم نفسي والآخرين بشكل أعمق.
10.ما طموحكِ في الحياة ؟
طموحي هو إني مقفش عند نقطة معينة، أفضل دايمًا أطور من أدواتي ومن نفسي على جميع الأصعدة سواء بيتي ، شغلي ، هوايتي ، تربيتي لأولادي أحس إني قدرت أكون أنا زي ما أحب أشوف نفسي .
11.هل لديكِ خُطط أو مشاريع كتابة قادمة ؟
عندي ديوان تحت الطبع بعنوان شعرة معاوية من بعد ما خلصته الحقيقه عندي حالة سكون مبقتش أكتب خالص لكن إن شاء الله أكسر الصمت دا بحاجة حلوة في النهاية.
12.هل وصلتِ لما تطمحين إليه بعد ؟
اكيد لسه في حاجات كتير محققتهاش لكن راضية جداً عن كل حاجة عملتها وربنا كرمني بيها .
13. هل خطواتكِ محسوبة في هذا المجال ؟
خطواتي مش محسوبة بمعنى إني مخططة هوصل لفين وإمتى، لكنها مدروسة بمعنى إني بحاول أتعلم وأطور من أدواتي كل يوم بحب أسيب كل خطوة تيجي في وقتها المناسب وبشكل طبيعي جداً، لأني مؤمنة إنْ الحاجة اللي بتطلع من القلب بتوصل من غير حسابات.
وفي النهاية نشكر الشاعرة " منى حموده " على وجودها بين جمهورنا الغفير وسِعة صدرها وتلك الكلمات التي بثَّت الأمل في قلوب الجميع ، متمنين لها المزيد من الازدهار في درب الأدب ...
حوار الكاتبة : خلود أيمن.
